Hunanardystio eich pibellau cyflenwi dŵr
Gall Contractwyr Cymeradwy WaterSafe hunanardystio eich gosodiad pibellau cyflenwi dŵr. Mae gennym rywfaint o wybodaeth ddefnyddiol i gwsmeriaid a gosodwyr.
Os oes angen i chi osod pibell gyflenwi dŵr newydd, rydym yn argymell eich bod yn defnyddio un o Gontractwyr Cymeradwy WaterSafe. Yn yr un modd, os ydych yn gyfrifol am osod, newid neu drwsio pibellau cyflenwi dŵr, dylech ddod yn aelod o WaterSafe. Gall Contractwyr Cymeradwy hunanardystio eu gosodiadau pibellau cyflenwi dŵr, gan arbed amser a thrafferth i'n cwsmeriaid pan ddaw hi i'r gwaith hwn. Mae'r dudalen hon yn cwmpasu'r pynciau canlynol:
- Beth yw hunanardystio?
- Sut ydw i'n hunanardystio fy mhibell cyflenwi dŵr?
- Beth yw Contractwr Cymeradwy WaterSafe?
- Pam dylwn i hunanardystio fy mhibell cyflenwi dŵr?
- Sut galla i ymuno â WaterSafe?
- Adnoddau ychwanegol a manylion cyswllt
Beth yw hunanardystio?
Rhaid i'r holl bibellau cyflenwi dŵr newydd a osodwyd gydymffurfio â'r Rheoliadau Cyflenwi Dŵr (Ffitiadau Dŵr) 1999 (y ‘Rheoliadau’). Fel rhan o unrhyw gysylltiad newydd, bydd angen i Dŵr Cymru fynd i'ch datblygiad i archwilio eich gosodiad dŵr preifat i wneud yn siŵr ei fod yn bodloni gofynion y Rheoliadau. Fodd bynnag, os caiff y gosodiad ei ardystio gan Gontractwr Cymeradwy WaterSafe, nid oes angen i Dŵr Cymru ymweld â safle i archwilio eich pibellau preifat. Caiff hyn ei adnabod fel ‘hunanardystio’.
Efallai y bydd dal angen i ni ymweld â'ch datblygiad i wirio ein seilwaith ni ac i arolygu'r cysylltiad ar gyfer ein contractwyr. Ni fydd hyn yn eich atal rhag bwrw ymlaen â'ch gwaith ar ôl ‘hunanardystio’ y gosodiad pibellau cyflenwi..
Os ydych yn adnewyddu eich pibell cyflenwi dŵr preifat ond nad ydych yn cael cysylltiad newydd gan Dŵr Cymru, rydym yn dal i argymell eich bod yn defnyddio Contractwyr Cymeradwy. Caiff buddiannau eu defnyddio eu hesbonio isod.
Sut ydw i'n hunanardystio fy mhibell cyflenwi dŵr?
Dim ond Contractwr Cymeradwy sy'n gyfreithiol gymwys, ac sy'n aelod o WaterSafe all gynnal hunanardystiad. Bydd yn cyhoeddi tystysgrif sy'n datgan bod y gwaith a osodwyd yn cydymffurfio â'r Rheoliadau, sydd yn ei le er mwyn diogelu eich cyflenwad dŵr a'r rhwydwaith dŵr yfed cyhoeddus.
Rhaid i Gontractwyr Cymeradwy beidio â chyhoeddi tystysgrif am waith sydd naill ai heb ei osod neu sy'n destun goruchwyliaeth agos. Rhaid rhannu'r dystysgrif hon â Dŵr Cymru hefyd, fel bod gennym gofnod o'r gwaith. Byddwn yn cadarnhau i chi ein bod wedi cael unrhyw dystysgrif a byddwn hefyd yn esbonio pa gamau nesaf sy'n ofynnol (os o gwbl).
Gallwch chwilio am aelod o WaterSafe ar y dudalen hon gan ddefnyddio'r bar chwilio isod.
Beth yw Contractwr Cymeradwy?
Contractwr Cymeradwy yw rhywun sy'n aelod o gynllun cydnabyddedig, fel WaterSafe. Caiff aelodau o WaterSafe eu fetio o ran eu cymwysterau ac yswiriant cyn cael eu caniatáu ar y cynllun. Cânt eu harchwilio'n gyfnodol hefyd i sicrhau bod ganddynt y wybodaeth ddiweddaraf am reoliadau ac arferion gorau diweddaraf y diwydiant. Mae ‘sectorau’ gwahanol o dan WaterSafe lle mae aelodau yn arbenigo mewn gwahanol fathau o waith, yn dibynnu ar eu sgiliau, eu cymwysterau a'u profiad. Gallwch chwilio am aelod o WaterSafe drwy ddefnyddio'r bar chwilio isod neu drwy fynd i https://www.watersafe.org.uk/.
Watersafe – Plymwyr Lleol wed’u Cymeradwyo
Dewch o hyd i'ch plymwr, agosaf sydd wedi'i gymeradwyo gan Watersafe, nodwch eich cod post neu defnyddiwch eich lleoliad.
Pam dylwn i ddefnyddio Contractwr Cymeradwy i hunanardystio fy mhibell cyflenwi dŵr?
Nid yn unig y mae defnyddio Contractwr Cymeradwy yn rhoi sicrwydd y bydd y gwaith yn unol â'r safon ofynnol ond bydd hefyd yn arbed amser a thrafferth pan ddaw hi i unrhyw waith pellach y mae angen ei wneud ar y safle, fel cysylltiad newydd. Unwaith y bydd y Contractwr Cymeradwy yn hunanardystio bod y gwaith yn cyrraedd y safonau gofynnol, gellir ôl-lenwi'r bibell gyflenwi a'r ffos, a fydd yn eich caniatáu i fwrw ymlaen â'r gwaith galluogi ar gyfer y cysylltiad newydd. Mae'r gallu i hunanardystio ac ôl-lenwi'r ffos hefyd yn gwella iechyd a diogelwch eich datblygiad drwy leihau nifer y ffosydd agored ar y safle.
Sut galla i ymuno â WaterSafe?
Cofrestr genedlaethol o Gontractwyr Cymeradwy yw WaterSafe sy'n dwyn ynghyd sawl cynllun gwahanol o dan un enw, hawdd ei ddefnyddio. Er mwyn ymuno â WaterSafe, rhaid i chi fod yn aelod o un o'r cynlluniau canlynol. Bydd gwneud hynny hefyd yn rhoi aelodaeth i WaterSafe i chi. Gallwch chi ymuno ag un o'r canlynol:
- Cynllun Plymeriaid Cymeradwy'r Diwydiant Dŵr (WIAPS)
- Sefydliad Siartredig y Peirianwyr Plymwaith a Gwresogi (CIPHE)
- Cymdeithas y Contractwyr Plymwaith a Gwresogi (APHC)
Bydd gan bob un o'r cynlluniau Contractwr Cymeradwy gwahanol hyn ofynion ymuno gwahanol, felly da chi, edrychwch ar eich cynllun dethol i weld pwy fydd yn eich helpu chi drwy'r broses gwneud cais.
Gallwch gael rhagor o wybodaeth am sut i ymuno â WaterSafe drwy fynd i'w gwefan yma.
Adnoddau defnyddiol a chwestiynau pellach
Rydym wedi cynhyrchu llyfryn canllaw defnyddiol i'r datblygwyr a'r gosodwyr hynny sy'n gosod pibellau cyflenwi dŵr. Gallwch ddod o hyd i hwn ar ein tudalen cyngor a chanllawiau y gellir dod o hyd iddi yma. Ewch i waelod y dudalen lle gallwch hefyd ddod o hyd i wybodaeth ddefnyddiol arall ar gyfer eich system gosodiadau a phlymwaith.
Os oes dal gennych gwestiynau neu os hoffech gael rhagor o gyngor, gallwch gysylltu â'r adran Rheoliadau Dŵr yn uniongyrchol drwy ffonio 01792 841 572 rhwng 8AM a 4PM o ddydd Llun i ddydd Iau a rhwng 8AM a 3:30PM ddydd Gwener. Gallwch hefyd anfon e-bost unrhyw bryd at WaterRegulations@dwrcymru.com.
Neu, os bydd angen i chi drafod eich cais am gysylltiad newydd, rhaid i chi gysylltu â'r Gwasanaethau Datblygwyr ar 0800 917 2652 rhwng 8:30AM a 5PM neu drwy anfon e-bost at New.Connections@dwrcymru.com. Gwnewch yn siŵr bod gennych unrhyw rifau cyfeirnod am y cais wrth law cyn ffonio.