Rydym ni eisiau gwneud popeth y gallwn i annog cwsmeriaid i ddod o hyd i ollyngiadau a’u trwsio cyn gynted â phosibl. Mae hyn yn ein helpu i leihau gollyngiadau a gallai arbed arian i chi. Dilynwch ychydig o gamau rhwydd i weld a oes gollyngiad o fewn ffiniau eich eiddo chi.
Gwirio am ollyngiadau
O bryd i’w gilydd mae gollyngiadau yn digwydd a gall hyn fod oherwydd oedran y bibell, gwendid yn y bibell, ffitiadau neu uniadau sy'n gollwng a symudiad yn y ddaear.
Os yw eich pibell wedi byrstio, peidiwch â chynhyrfu.
- Ceisiwch ddod o hyd i ble mae'r gollyngiad - yna atal y cyflenwad drwy droi'r stoptap i’r dde.
- Agorwch bob tap i leihau llifogydd.
- Amsugnwch neu rhwystrwch y dŵr sy'n dianc gyda thyweli trwchus.
- Diffoddwch eich trydan: os yw'r dŵr yn agos at unrhyw beth trydanol - gan gynnwys goleuadau, socedi neu declynnau - peidiwch â'u cyffwrdd. Gall gwifrau trydan sy'n cael eu difrodi gan ddŵr fod yn beryglus iawn ac mae'n debyg y bydd angen i chi ffonio gweithiwr proffesiynol i atgyweirio’r difrod.
- Ffoniwch blymwr cofrestredig - os oes angen cymorth arnoch i atgyweirio pibell sydd wedi byrstio, cysylltwch â phlymwr sydd wedi’i gymeradwyo gan Watersafe..
Perchnogaeth a Chyfrifoldeb Dros Bibellau
Ni sydd biau’r pibellau sy'n rhedeg at derfyn y stryd a byddwn bob tro yn eu hatgyweirio cyn gynted â phosibl.
Rhwng terfyn y stryd a'ch stoptap mewnol mae'r bibell gyflenwi yn breifat. Er mai perchennog yr eiddo sydd biau’r bibell hon byddwn yn cynnig atgyweirio am ddim lle bo modd.
Cyfrifoldeb y perchennog yw atgyweirio'r holl bibellau a ffitiadau mewnol y tu mewn i'r eiddo.
Os byddwch yn sylwi ar ollyngiad neu'n credu bod gennych un ger eich eiddo, cysylltwch â ni ar 0800 052 0130 (24 awr y dydd, 7 diwrnod yr wythnos).
Weithiau gall pibell gyflenwi dŵr breifat ddarparu dŵr i sawl eiddo, os gwelwn fod eich pibell ddŵr yn cael ei rhannu byddwn yn trafod pob dewis o ran sut i'w hatgyweirio gyda chi pan fyddwn yn galw i’ch gweld. Efallai y bydd gennych ddiddordeb mewn gosod eich pibell ddŵr ar wahân eich hun, a byddem yn argymell hynny bob tro.
Gall pibell gyflenwi breifat fod yn eithaf hir a chroesi ffin eiddo rhywun arall. Os yw eich pibell gyflenwi yn rhedeg ar draws ffiniau eich cymdogion yna chi hefyd sy'n gyfrifol am y rhan hon o'r bibell.
Mae ein cynllun trwsio gollyngiadau am ddim ar gael i gwsmeriaid sydd berchen ar eu cartrefi ac yn byw yno; nid yw’r cynllun ar gael i gartrefi sy’n cael eu rhentu i rywun arall neu sy’n fusnes.
Efallai y bydd gennych hawl i gymorth drwy ein Cynllun Trwsio Gollyngiadau sy’n cynnwys:
- Cyfraniad ariannol tuag at atgyweiriad.
- Cyfraniad ariannol tuag at bibell gyflenwi newydd, gydag ailgysylltiad am ddim neu gysylltiad newydd â’n prif gyflenwad, os ydych ar gyflenwad ar y cyd.
Gwneir yr holl daliadau ar ôl cael cadarnhad gan Dŵr Cymru bod y gollyngiad wedi’i drwsio, ac ystyrir nad oes unrhyw ollyngiadau ar eich cyflenwad. Taliad untro fesul pibell gyflenwi yw hwn, a bydd arnom angen prawf bod taliad wedi ei wneud, felly cadwch unrhyw dderbynebau ac anfonebau perthnasol.
Watersafe – Plymwyr Lleol wed’u Cymeradwyo
Dewch o hyd i'ch plymwr, agosaf sydd wedi'i gymeradwyo gan Watersafe, nodwch eich cod post neu defnyddiwch eich lleoliad.