Dydd Llun: Materion Ariannol

Yn Dŵr Cymru, rydyn ni yma i chi.

Mae gennym nifer o opsiynau i helpu cwsmeriaid i arbed arian ar eu biliau dŵr, yn ogystal â llawer o gymorth i bobl sydd wedi syrthio ar ei hôl hi gyda’u taliadau. Fe gynorthwyon ni dros 146,000 o gwsmeriaid y llynedd, ond rydyn ni’n gwybod fod yna ragor o bobl a allai elwa hefyd.

Os yw’r esgid yn gwasgu, plîs peidiwch â diodde’n dawel. Cysylltwch â ni i siarad ag un o’n cynghorwyr cyfeillgar heddiw. Rydyn ni’n awyddus i helpu ein cwsmeriaid a dod o hyd i atebion i unrhyw un sy’n cael trafferth fforddio talu eu bil dŵr.

Mam sengl i bump o Lanilltud Faerdref yw Bethan Davies. Cafodd gymorth gyda’i bil dŵr gan Ddŵr Cymru’n ddiweddar. Dywedodd: “Roeddwn i’n mynychu apwyntiad yn y Ganolfan Waith pan ddywedodd cynghorydd fod rhywun o Ddŵr Cymru yno i helpu cwsmeriaid gyda’u biliau. Am fy mod i’n gwybod fy mod i mewn dyled gyda fy mil dŵr, roeddwn i’n poeni am siarad â rhywun o Ddŵr Cymru ar y cychwyn. Nawr, rwy’n difaru peidio â gwneud hynny’n gynt.

“Esboniodd Jody, [Ymgynghorydd Ymgyrchoedd Hyrwyddo Dŵr Cymru] yr opsiynau a allai fod ar gael i mi ar ôl edrych ar fy incwm, a dywedodd ‘gallwn ni dy helpu di’. Helpodd hi fi i dorri £500 oddi ar fy mil, trwy fy ngosod ar y tariff HelpU, a helpodd fi i wneud fy nhaliadau’n fwy hydrin fel y gallwn glirio fy nyled. Bydd hyn yn gwneud gwahaniaeth mawr i fy nheulu, a’r unig beth rwy’n difaru nawr yw’r ffaith na wnes i siarad â Dŵr Cymru’n gynt; doedd yna ddim beirniadaeth, a’r cyfan roedden nhw am ei wneud oedd helpu. Gallwn i fod wedi osgoi llwyth o straen.

Ymhlith yr opsiynau am gymorth ariannol sydd ar gael gan Ddŵr Cymru mae:

• Y tariff HelpU, sy’n helpu aelwydydd incwm isel sy’n derbyn budd-daliadau ar sail prawf moddion, trwy osod cap ar swm eu biliau dŵr.
• Cymuned, mewn partneriaeth â Chyngor Ar Bopeth, Cymru Gynnes ac elusen ddyledion StepChange, sy’n helpu aelwydydd sy’n gweithio sy’n cael trafferth fforddio’r hanfodion, fel eu biliau dŵr.
• Cynllun cymorth dyledion y Gronfa Cymorth i Gwsmeriaid, sy’n helpu’r bobl hynny sy’n wynebu caledi ariannol difrifol i ymdopi â’u taliadau.

I gael rhagor o fanylion am y cymorth ariannol sydd ar gael gan Ddŵr Cymru, ewch i www.dwrcymru.com/costaubyw.