Gwybodaeth am Daliadau Iawndal mewn perthynas â’r byrst yn y brif bibell ddŵr - Broughton, Sir y Fflint
Ynglŷn â'ch iawndal
Sut mae eich iawndal wedi'i gyfrifo
Rydym yn gwybod nad yw dŵr yn cyrraedd pob cartref yn yr un modd. Mae'n dibynnu ar leoliad, er enghraifft, yn ystod digwyddiad, gall cartrefi ar dir uwch golli dŵr yn gynt a gweld y dŵr yn dychwelyd yn hwyrach, na'r rhai ar dir is.
Er mwyn deall yr effaith ar bob cartref pan fydd toriadau dŵr, rydym yn defnyddio synwyryddion pwysedd arbennig yn ein pibellau dŵr. Mae'r rhain yn dangos i ni pan fydd pwysedd dŵr yn newid, a thrwy gyfuno hynny â gwybodaeth am leoliad eich eiddo, gallwn gyfrifo yn union pryd y dechreuodd neu y stopiodd y cyflenwad yn eich eiddo.
Gallai hyn olygu y gall cartrefi sydd wedi'u lleoli'n agos at ei gilydd dderbyn symiau gwahanol o iawndal, gan nad ydym yn edrych ar yr ardal ehangach yn unig, gallwn weld yr effaith ar eiddo unigol.
Y dull hwn o gyfrifo yw'r ffordd fwyaf cywir a theg sydd ar gael i ni.
Sut mae'r taliad yn cael ei gyfrifo
Os bydd tarfu ar eich cyflenwad dŵr yn barhaus am fwy na 12 awr yn olynol, mae gennych hawl i'r iawndal canlynol:
- £30 ar ôl i'r cyfnod llawn cyntaf o 12 awr fynd heibio.
- Ar ôl hynny, telir £30 ychwanegol am bob cyfnod o 12 awr llawn arall y mae'r cyflenwad yn parhau i ffwrdd.
Manylion Pwysig:
- Mae'r cloc yn dechrau pan fydd y dŵr yn mynd i ffwrdd.
- Dim ond ar ôl y 12 awr lawn gyntaf y byddwn yn dechrau asesu iawndal.
- Rhaid i unrhyw amser ychwanegol fod yn 12 awr lawn i fod yn gymwys i gael £30 arall. Er enghraifft:
- Os yw'r dŵr i ffwrdd am 23 awr, byddwch chi'n derbyn £30.
- Os yw’r dŵr i ffwrdd am 25 awr, byddwch chi'n derbyn £60.
- Os yw’r dŵr i ffwrdd am 36 awr, byddwch chi'n derbyn £90 (£30 am bob cyfnod llawn o 12 awr).
Cwsmeriaid domestig
- Byddwn ni’n talu £30 i bob aelwyd cymwys am bob 12 awr o doriadau yn eu cyflenwadau.
- Byddwn ni’n talu’r swm yn awtomatig i gyfrifon banc cwsmeriaid neu’n anfon siec at gwsmeriaid heb gyfrif os nad ydynt mewn dyled i ni.
- Bydd taliadau cwsmeriaid â dyledion yn mynd i’w cyfrif Dŵr Cymru.
- Telir iawndal i ddeiliad cyfrifon/cwsmeriaid sy’n talu’r biliau. Bydd angen i unrhyw ddeiliaid cyfrifon nad ydynt yn byw yn yr eiddo drosglwyddo’r taliad iawndal i’r preswylwyr.
- Caiff y taliadau eu gwneud cyn pen yr 20 diwrnod gwaith nesaf.
Cwestiynau Cyffredin am gwsmeriad domestig ar-lein yma.
Ffurflen Cwsmeriad busnes
Mae’n ddrwg gennym am y toriad yn eich cyflenwad dŵr yn Sir y Fflint.
Bydd pob cwsmer busnes yn derbyn £75 o iawndal am bob 12 awr y buont heb gyflenwad.
Yn ogystal, mae Dŵr Cymru wedi cytuno i wneud cyfraniadau ewyllys da i gwsmeriaid busnes tuag at gostau penodol/colledion elw gros hyd at £2500.
Mae’r canllawiau hyn yn amlinellu’r gofynion cymhwyster, y meini prawf a’r broses ar gyfer ymgeisio am gyfraniad ewyllys da tuag at gostau/colledion elw gros, a dylid eu darllen yn eu cyfanrwydd cyn cyflwyno cais am Daliad Ewyllys Da.
Mae dyletswydd ar y busnesau o dan sylw i gymryd pob cam rhesymol i gadw eu costau/colledion elw gros mor isel â phosibl.
Os, ar ôl darllen y nodiadau arweiniad yma yn eu cyfanrwydd, ydych chi’n credu eich bod chi’n bodloni’r meini prawf am daliad ewyllys da ar ben y taliad sy’n cael ei wneud yn awtomatig, llenwch y cais pan fydd hwnnw ar gael, gan ddarparu’r wybodaeth a amlinellir yn y canllawiau hyn ac ar weffurflenni’r Cais Ewyllys Da.
Cwestiynau Cyffredin am gwsmeriad busnes ar-lein yma.
Meini prawf cymhwyster
Rhaid bodloni’r meini prawf canlynol er mwyn i’ch busnes fod yn gymwys i wneud cais am gyfraniad ewyllys da.
- Rydych chi’n gwsmer busnes y mae’r toriad mewn cyflenwadau dŵr yn Sir y Fflint wedi effeithio’n uniongyrchol arno.
- Rhaid i chi fod yn fusnes sydd wedi ei leoli’n barhaol yn lleoliad y cais e.e. nid yn fusnes symudol/ymweld, gan gynnwys gwasanaethau tacsi.
- Rhaid i chi fod wedi cofrestru fel busnes a/neu yn talu taliadau busnes am eich Dŵr a Charthffosiaeth
- Rhaid i’ch busnes fod wedi cofrestru gyda CThEF.
Mae cymhwyster am gyfraniad ewyllys da, ac unrhyw gyfraniadau a wneir ar ddisgresiwn Dŵr Cymru.
Proses y Ceisiadau Ewyllys Da
Rydyn ni’n gwybod y bydd gan lawer o gwsmeriaid busnes yswiriant toriad mewn busnes. Os felly, dylid cyflwyno unrhyw hawliadau am gostau/colledion elw gros a dynnir trwy eich yswiriant. Lle bo yswiriant gan gwsmeriaid, a’u bod wedi defnyddio eu hyswiriant eu hunain, mae Dŵr Cymru’n fodlon ystyried cyfrannu at unrhyw ordal ar y polisi os darperir tystiolaeth ddigonol. Mae yna weffurflen benodol i gyflwyno cais am y cyfraniad ewyllys da yma, ac mae rhagor o fanylion isod. Rhaid i unrhyw gostau/colledion elw gros gael eu hategu gan y dystiolaeth a geisir yn y canllawiau hyn ac ar y weffurlen Cais Ewyllys Da. Sicrhewch fod gennych chi’r dystiolaeth berthnasol wrth law cyn dechrau’r weffurflen. Pan ddaw eich cais i law, gallwn ofyn i chi gyflwyno tystiolaeth ychwanegol i gydategu eich cais, neu ofyn am wybodaeth ychwanegol i ategu ein hasesiad.
Ddim yn Gymwys
Dylid nodi nad yw’r costau/colledion elw gros a ystyrir yn cynnwys ffioedd proffesiynol, gan gynnwys unrhyw ffioedd sy’n gysylltiedig â llenwi’r cais, ac unrhyw gynnydd mewn premiymau yswiriant. Ni chaiff unrhyw daliadau eu gwneud mewn perthynas â’r ddau gategori yma.
Mae’r isod yn amlinellu’r gwahanol weffurflenni Cais Ewyllys Da y gallwch eu llenwi. Dim ond un gweffurflen y Cwsmer Busnes y cewch ei llenwi.
Colledion Elw Gros yn Unig
Bydd llenwi’r weffurflen hon yn caniatáu i chi dalu taliadau ewyllys da tuag at y Colledion Elw Gros y mae eich busnes wedi eu tynnu mewn perthynas â’r byrst yn y brif bibell ddŵr rhwng dydd Mercher 13 Awst 2025 a dydd Sul, 17 Awst 2025.
Bydd gofyn i chi ddarparu’r wybodaeth ganlynol:
- Gwerthiannau dyddiol net o TAW (os yw’r busnes wedi cofrestru ar gyfer TAW) am y cyfnod rhwng dydd Llun 30 Mehefin 2025 a heddiw (dyddiad cyflwyno’r cais).
- Copi o’r set ddiwethaf o gyfrifon diwedd blwyddyn, gan gynnwys cyfrif elw a cholled manwl.
Ar ôl i’ch cais ddod i law, gallwn ofyn am wybodaeth bellach i’n helpu ni i benderfynu pa lefel o gyfraniad ewyllys da fydd yn daladwy.
Costau Ychwanegol i Barhau i Weithredu yn Unig
Bydd llenwi’r weffurflen hon yn caniatáu i ni ystyried taliadau ewyllys da tuag at gostau gweithredu ychwanegol oherwydd y “byrst yn y brif bibell ddŵr”. Bydd gofyn i chi ddarparu tystiolaeth o anfonebau/derbynebion perthnasol.
Colledion Elw Gros a Chostau Ychwanegol i Barhau i Weithredu
Bydd llenwi’r weffurflen hon yn caniatáu i ni ystyried gwneud taliadau ewyllys da tuag at gostau Colledion Elw Gros a’r costau gweithredu ychwanegol y mae eich busnes wedi eu tynnu yn sgil y byrst ym mhrif bibell ddŵr Dŵr Cymru rhwng dydd Mercher, 13 Awst 2025 a dydd Sul, 17 Awst 2025. Bydd gofyn i chi ddarparu tystiolaeth o’r canlynol:
- Gwerthiannau dyddiol net o TAW (os yw’r busnes wedi cofrestru ar gyfer TAW) am y cyfnod rhwng dydd Llun 30 Mehefin 2025 a heddiw (dyddiad cyflwyno’r cais).
- Copi o’r set ddiwethaf o gyfrifon diwedd blwyddyn, gan gynnwys cyfrif elw a cholled manwl.
Ar ôl i’ch cais ddod i law, gallwn ofyn am wybodaeth bellach i’n helpu ni i benderfynu pa lefel o gyfraniad ewyllys da fydd yn daladwy.
Nodyn: Ni chaniateir cyflwyno cais am ‘Golledion Elw Gros’ a ‘Chostau Ychwanegol i Barhau i Weithredu’ ill dau ar yr un dyddiad (gallwch naill ai wneud cais am ‘Golledion Elw Gros’ neu am ‘Gostau Ychwanegol i Barhau i Weithredu’ am unrhyw ddiwrnod penodol). Rhagwelir taw dim ond lle bo cwsmer wedi aros yn agored gan dynnu costau ychwanegol ond wedi gorfod cau wedyn y bydd yna geisiadau am ‘Golledion Elw Gros’ a ‘Chostau Ychwanegol i Barhau i Weithredu’.
Cyfraniad at eich gordal yswiriant
Bydd llenwi’r weffurflen hon yn caniatáu i ni ystyried taliadau ewyllys da tuag at y gordal yswiriant a dynnwyd ar ôl setlo hawliad yswiriant eich busnes mewn perthynas â’r “byrst yn y brif bibell ddŵr”.
Bydd gofyn i chi ddarparu tystiolaeth o’r gordal, a rhaid bod yr hawliad mewn perthynas â’r ‘byrst yn y brif bibell ddŵr’ wedi cael ei dalu’n llwyddiannus.
Datganiad
Rhaid i rywun sydd ag awdurdod i lofnodi ar ran eich busnes e.e. perchennog y busnes os ydych chi’n unig fasnachwr; partner mewn partneriaeth gofrestredig neu heb ei gofrestru; neu swyddog mewn cwmni cyfyngedig baratoi a llofnodi’r datganiad.
Pan ddaw eich cais a’r dogfennau ategol i law, cewch neges i gydnabod hynny trwy e-bost.
Ein nod yw asesu a gwneud penderfyniad ar eich cais cyn pen 20 diwrnod gwaith ar ôl iddo ddod i law.
Gallai’r amserlenni fod yn hirach yn dibynnu ar werth eich cais a pha mor gymhleth yw e, yn ogystal â pha mor gyflym y byddwch chi’n ymateb i geisiadau. Os felly, byddwn ni’n rhoi gwybod i chi.
Gall Dŵr Cymru benodi trydydd parti i’w gynorthwyo neu i asesu unrhyw geisiadau. Caiff trydydd partïon eu penodi heb roi gwybod i chi ymlaen llaw. Dŵr Cymru fydd yn talu’r costau hyn.