Sychder yn Datblygu yng nghanolbarth a de Ceredigion
As of 12th June 2025, rydyn ni’n datgan statws ‘Sychder yn Datblygu’ yng nghanolbarth a de Ceredigion oherwydd lefelau’r storfeydd dŵr sydd yng nghronfeydd dŵr yr ardal.
Mae hynny’n golygu ein bod ni bellach ar Gam 2 (o 6) yn yr ardal hon - sef Sychder yn Datblygu: Mae’r amodau’n sych ac mae’r rhagolygon yn addo tywydd sych a braf parhaus. Nid yw’r glaw ysbeidiol diweddar yn yr ardal wedi bod yn ddigon i wneud gwahaniaeth i lefelau’r cronfeydd. Mae’r adnoddau dŵr yn dechrau dangos arwyddion fod sychder yn datblygu, ond mewn ardaloedd lleol iawn yn unig. Dyma'r unig faes sy'n peri pryder ar hyn o bryd.
Nid oes yna unrhyw gyfyngiadau ar ddefnyddio dŵr ar hyn o bryd, ond rydyn ni’n gofyn i gwsmeriaid weithio gyda ni i ddefnyddio dŵr yn ofalus.
Camau Sychder
Cam 1 - Gweithrediad Arferol
Actif | Cam 2 - Sychder yn datblygu
Mae’r amodau’n sych ac mae’r rhagolygon yn addo tywydd sych a braf parhaus. Mae’r adnoddau dŵr yn dechrau dangos arwyddion fod sychder yn datblygu, ond mewn ardaloedd lleol iawn yn unig.
Cam 3 - Sychder
Yn sgil cyfnod estynedig o dywydd sych, mae’r adnoddau dŵr yn is na’r disgwyl ar gyfer yr adeg hon o’r flwyddyn. Er mwyn amddiffyn cyflenwadau, mae’n bosibl y bydd angen gwaharddiad dros dro ar ddefnydd rhai ardaloedd.
Cam 4 - Sychder Difrifol
Mae parhad y tywydd sych estynedig yn golygu bod yr adnoddau dŵr yn isel dros ben. Rhoddir mesurau ychwanegol ar waith i gynnal cyflenwadau ar gyfer cwsmeriaid lle mae mesurau defnydd dros dro yn gweithredu.
Cam 5 - Mesurau Argyfwng
Mae’r adnoddau dŵr wedi cyrraedd lefelau lle mae hi’n amhosibl cynnal cyflenwad rheolaidd ar gyfer cwsmeriaid ac felly mae angen rhoi mesurau argyfwng ar waith. Gallai hynny gynnwys defnyddio safbibellau, a thoriadau mewn cyflenwadau dŵr ar adegau penodol, neu fesurau helaeth i reoli’r pwysedd wrth ystyried yr effaith bosibl ar ansawdd dŵr o fewn ardaloedd penodol ar ein rhwydwaith cyflenwi dŵr.
Cam 6 – Diwedd y Sychder
Trwy gydweithio dan amodau tywydd sych arbennig o ymestynnol, gallwn gyhoeddi diwedd yr amodau sychder a’r cyfyngiadau dros dro a rhoddwyd ar waith.
Pa ardal sydd o dan sylw?
Mae’r ardal o dan sylw’n cwmpasu canolbarth a de Ceredigion, rhannau o ogledd Sir Benfro a Sir Gaerfyrddin. Mae’n cwmpasu 32,000 eiddo o Lanon, Llangwyryfon a Chwm Ystwyth yng Ngheredigion, i lawr i Grymych, Llanfyrnach a Nanhyfer yng ngogledd Sir Benfro, ynghyd â rhannau o ogledd Sir Gâr i lawr i Ffarmers, Pencader a Hermon hefyd.
I ganfod a yw hyn yn effeithio ar eich ardal chi defnyddiwch y chwiliwr cod post yma.
O ble mae dŵr yr ardal yma’n dod?
Daw cyflenwadau rhwydwaith dŵr yr ardal o gronfeydd dŵr Pyllau Teifi ar ymyl orllewinol Mynyddoedd Cambria, ac o ddŵr sy’n cael ei godi o afon Teifi yn Llechryd.
Pam fod hyn yn digwydd?
Mae lefelau’r gronfa’n isel, tua 28% yn is na’r un adeg y llynedd, ac mae hynny’n dangos bod sychder yn bosibilrwydd yn yr ardal dros yr haf.
Mae cronfeydd dŵr Pyllau Teifi wedi gweld cwta 56% o’r glawiad cyfartalog tymor hir disgwyliedig rhwng Mawrth a Mai eleni. Nid yw’r glaw ysbeidiol diweddar wedi bod yn ddigon i wneud gwahaniaeth i lefelau’r cronfeydd dŵr.
Mae’r tir mawnog sy’n amgylchynu’r cronfeydd yma’n dal dŵr, sy’n golygu bod y dŵr yn cael ei ryddhau nôl i’r amgylchedd yn arafach nac mewn ardaloedd eraill. Nid yw’r glawiad dros y pythefnos diwethaf wedi gwneud fawr ddim i wella’r sefyllfa.
Os na fydd lefelau’r cronfeydd yn yr ardal yn ymadfer yn sgil glaw dros yr ychydig wythnosau nesaf, mae’n bosibl y bydd angen i ni symud i gam tri, a chyhoeddi gwaharddiadau dros dro ar ddefnydd - neu waharddiad ar ddefnyddio pibellau dyfrio.
Mae’r fideo isod yn esbonio rhagor am Byllau Teifi, adnoddau dŵr ac effaith unrhyw gyfnod estynedig o dywydd sych. Mae hi’n dangos hefyd beth rydyn ni fel cwmni’n ei wneud i helpu, a beth y gallwch chi ei wneud i arbed dŵr.
Beth yw’r camau nesaf?
Rydyn ni’n monitro’r sefyllfa’n ofalus, a chaiff y dudalen hon ei diweddaru wrth i’r sefyllfa newid. Byddwn ni’n dilyn gwahanol ofynion a chamau’r Cynllun Sychder statudol ac yn cyflwyno cyfyngiadau os oes angen.