Newyddion / Datganiadau i’r wasg

14/06/2012

Mae Dŵr Cymru Welsh Water am fuddsoddi £1 biliwn dros y tair blynedd nesaf

Fe wnaeth Dŵr Cymru Welsh Water heddiw gyhoeddi y byddant yn buddsoddi £1 biliwn dros y tair blynedd nesaf ar ystod eang o brosiectau yn ymwneud â seilwaith ledled Cymru, Swydd Henfford a Glannau Dyfrdwy.

Mae’r rhaglen hon yn cynnwys £100 miliwn o fuddsoddiad ychwanegol mewn prosiectau nad oeddynt yn wreiddiol wedi’u clustnodi ar gyfer y cyfnod buddsoddi rheoliadol cyfredol o 5 mlynedd (2010-15). Mae’r rhaglen garlam hon yn cael ei gwneud yn bosibl gan y buddion effeithlonrwydd o ran cyllido a ddaw o berchnogaeth “nid-er-elw” unigryw Glas Cymru ar Dŵr Cymru.

Fe fydd y gwariant uchaf erioed hwn ar fuddsoddi yn cael ei wneud, tra bod biliau cyfartalog i gartrefi yn gostwng mewn termau real. Fe fydd yn cyflawni llu o welliannau i’r gwasanaeth cyhoeddus hanfodol y mae Dŵr Cymru yn ei ddarparu i 3 miliwn o bobl, yn cynnwys, er enghraifft, gwaith uwchraddio sylweddol i weithfeydd trin dŵr a dŵr gwastraff mewn lleoedd fel Llyswen (Powys), Y Bala (Meirionnydd) ac Aberporth (Ceredigion), a gwell cynlluniau ynni adnewyddadwy fel yn ein gwaith trin dŵr gwastraff yn Wrecsam. Ar adeg pan fo llawer o gwmnïau a chyrff cyhoeddus yn cwtogi ar fuddsoddi, mae’r rhaglen fuddsoddi hon yn cyflogi tua 10% o’r sector adeiladu yn ein rhanbarth, gyda mwy na 50% o wariant yn mynd i gwmnïau lleol yn y gadwyn gyflenwi, gan gynnal tua 1,500 o swyddi.

Gan gyhoeddi canlyniadau’r Cwmni ar gyfer y flwyddyn yn gorffen yr 31ain o Fawrth, 2012, fe ddywedodd Bob Ayling, y Cadeirydd: “Ein huchelgais yw cyflawni’r canlyniadau gorau posibl i’n cwsmeriaid, gan gyflenwi dŵr yfed o’r ansawdd uchaf a diogelu’r amgylchedd ‘rydym yn ei warchod ar ran y cymunedau ‘rydym yn eu gwasanaethu. ‘Rydym hefyd yn gobeithio dangos bod y model busnes unigryw ‘rydym wedi’i sefydlu ar gyfer y diwydiant dŵr yn ein rhanbarth yn gweithio i’n cwsmeriaid. ‘Rwyf yn falch o adrodd ein bod ni wedi gwneud cynnydd sylweddol yn y flwyddyn tuag at y ddau amcan hyn.

“Mae model Glas Cymru yn golygu mai’n blaenoriaeth gyntaf yw i’n cwsmeriaid a gwarchod seilwaith helaeth Dŵr Cymru ar gyfer cenedlaethau’r dyfodol. ‘Rydym wedi gallu cyflymu buddsoddiad a gwneud mwy i’n cwsmeriaid tra bod biliau yn gostwng mewn termau real. ‘Rydym hefyd yn gwella’r profiad y mae’n cwsmeriaid yn ei dderbyn pan fônt yn delio gyda ni o ddydd i ddydd. Fe gyrhaeddodd boddhad cwsmeriaid y lefel uchaf erioed o 90%, ac ‘roeddem yn cael ein rhestru ymysg y cwmnïau gorau ar dabl cynghrair Y Swyddfa Gwasanaethau Dŵr (Ofwat) yn y diwydiant o ran boddhad cwsmeriaid. Mae cwynion gan gwsmeriaid wedi mwy na haneru, ac nid ydynt erioed wedi bod yn is. Yr hyn sydd wedi bod yn neilltuol o galonogol yw’r canlyniadau o’r ddau arolwg annibynnol o’n cwsmeriaid busnes mwyaf, a ddangosodd bod boddhad cyffredinol gyda’n gwasanaeth yn awr wedi cyrraedd 89%. Ac ar adeg pan fo incymau cartrefi dan bwysau mawr, yn enwedig yn ein rhanbarth ni, ‘rydym yn falch ein bod ni’n gwneud mwy nag unrhyw gwmni dŵr arall i helpu, gyda mwy na 44,000 o’n cwsmeriaid lleiaf cefnog yn elwa oddi wrth un o’n tariffau cymdeithasol neu’n Cronfa Cymorth Cwsmeriaid.”

Fe ellir canfod copi llawn o Adroddiad y Canlyniadau Rhagarweiniol yma - cliciwch yma

Uchafbwyntiau am y flwyddyn

Canlyniadau Ariannol

• y cynnydd isaf mewn biliau o’r holl gwmnïau dŵr a charthffosiaeth am yr ail flwyddyn yn olynol.  Ar ôl didynnu chwyddiant Y Mynegai Prisiau Manwerthu (RPI), mae bil cyfartalog Dŵr Cymru i gartrefi yn cael ei ragamcanu gan Ofwat i fod yn 6% yn is yn 2015 nag yr oedd yn y flwyddyn cyn i Glas Cymru afael yn awenau perchnogaeth Dŵr Cymru;


• perfformiad sy’n arwain yn y sector gyda gweithredu yn effeithlon o ran costau, gyda 3% o ostyngiad real pellach mewn costau gweithredu, gan fynd â chyfanswm y gostyngiad i 8% ers 2001;


• gerio – cyfanswm y benthyciadau net fel canran o werth yr asedau rheoliadol – wedi’i ostwng i 65% o 67% yn 2011, ac o 93% yn 2001;


• statws credyd uchaf yn sector cyfleustodau’r Deyrnas Unedig;


• buddsoddiad cyfalaf o £262 miliwn (i fyny o £242 miliwn yn 2011);


• elw (cyn treth a symudiadau gwerth teg) o £7 miliwn wedi’i gadw yn y busnes er budd cwsmeriaid.

Gwasanaeth i Gwsmeriaid

• ansawdd dŵr uchel yn cael ei gynnal, gyda 99.96% o samplau a gymerwyd wrth dapiau cwsmeriaid yn cydymffurfio â safonau;


• 90% o foddhad cwsmeriaid, gyda gwasanaeth o ddydd i ddydd, fel a fesurir gan ymchwil olrhain annibynnol a gan ymchwil a gynhaliwyd gan Ofwat, rheolydd y diwydiant, fel ei gilydd;


• 89% o foddhad cwsmeriaid busnes, fel a fesurir gan ymchwil annibynnol a gynhaliwyd gyda chwsmeriaid mwyaf Dŵr Cymru;


• cwynion gan gwsmeriaid yn cael eu cwtogi fwy na hanner, i lai na 5,000;


• dim ond 116 eiddo a brofodd doriadau heb eu cynllunio i gyflenwad oedd yn para mwy na 6 awr;


• mae carthffosydd preifat yn awr yn gyfrifoldeb i Dŵr Cymru, sydd o ran potensial yn dyblu maint ein rhwydwaith carthffosiaeth, gan gael gwared â gofid a chostau i lawer o’n cwsmeriaid cartrefi;


• mwy na 13,000 o rwystrau i garthffosydd yn cael eu clirio, gan gyfyngu ar nifer y digwyddiadau o lifogydd i lai na 200 o eiddo, y canlyniad gorau ers amryw o flynyddoedd;


• tua 44,000 o gwsmeriaid cartrefi yn elwa o un o dariffau cymdeithasol Dŵr Cymru sy’n arwain yn y sector a’r Gronfa Cymorth Cwsmeriaid.

Yr Amgylchedd

• fe wnaeth 43 o draethau a phum marina ennill Baneri Glas – sef traean o’r cyfanswm a ddyfarnwyd i’r cyfan yn y Deyrnas Unedig – ac fe gafodd 53 o wobrau Arfordir Gwyrdd ar gyfer traethau gwledig hefyd eu hennill;


• nifer uchaf erioed o draethau Cymru’n cael eu cymeradwyo yn Y Canllaw Traethau Da (The Good Beach Guide);


• targed gollyngiadau’n cael ei gyrraedd, ac mae o yn awr ar ei lefel isaf erioed - mae gollyngiadau wedi’u haneru ers yr 1990au;


• dim cyfyngiadau ar ddefnyddio dŵr ledled ein rhanbarth gweithredol ers 23 o flynyddoedd;


• digwyddiadau o lygredd difrifol yn cael eu cwtogi i ond pedwar, a chyfanswm y digwyddiadau o lygredd a achoswyd gan rwystrau mewn carthffosydd a chyfarpar sy’n torri hefyd yn is; fodd bynnag, ni wnaeth 22 o weithfeydd trin dŵr gwastraff (allan o fwy nag 800) gydymffurfio â’u caniatâd; ar ben hynny, ni chymerwyd samplau digonol mewn pedwar gwaith arall i allu dangos cydymffurfiad; mae cynllun cildroad “llwybr carlam”, a ategir gan fuddsoddiad ychwanegol o £30 miliwn, yn datblygu’n dda, ac mae’n perfformiad hyd yn hyn yn 2012 yn well nag yn yr un cyfnod ‘llynedd.


• allyriadau carbon yn cael eu cwtogi 12% neu 40,000 tunnell fetrig, gyda chynlluniau ynni adnewyddadwy gwyrdd newydd yn llwyr weithredol yng Nghaerdydd a Phort Talbot.  

Gorffen

Ymholiadau i swyddfa gwasg Dŵr Cymru Welsh Water ar 029 2055 6140.